Trova na Palora

abbanniari  {verbu}

puisìa:

• Doppu pagari dui, tri tamburina
  e fari vanniari ca Centona
  era 'na maravigghia, 'na rigina,
  'na santa spiccicata di la cona!...
  ("Dialugu tra l'auturi e lu so' libru", Martoglio)

addunarisi  {verbu}

puisìa:

• Passanu l'uri e non vi nn'addunati
  ch'è notti e chi astutaru li lampiuni,
  non v'addunati ca misu a 'sta gnuni
  vi guardu 'ntra l'ucchiuzzi 'nnamurati.
  ("Vanna", Martoglio)

bisognu  {sust.}

puisìa:

• Non c'è bisognu ca ti fai 'na meta;
  finu a quannu tu lassi ppi la strata
  'ss' oduri di Sicilia 'ncueta,
  la to' carrera è sempri assicurata.
  ("Dialugu tra l'auturi e lu so' libru", Martoglio)

ciumi  {sust.}

puisìa:

• Vucca di santa chi non sa tradiri,
  sciumi d'amuri, ca lu munnu allaja,
  oggi, mammuzza, chi ti pozzu diri?
  ("Onomasticu", Martoglio)

cumpagnu  {sust.}

puisìa:

• Vegnu di notti e vegnu scumpagnatu,
  – sulu cumpagnu lu pinseri miu
  pirchí mi scantu di lu vicinatu
  e di l'amici mi nn'aggilusíu.
  ("Vanna", Martoglio)

cunfortu  {sust.}

puisìa:

• Te sula, 'ntra li jorna di scunfortu,
  m'haju truvatu, amica e cunfissuri,
  te sula ha' statu l'unicu cunortu,
  barsamu e 'nguentu pri li me duluri.
  ("Onomasticu", Martoglio)

jastimari  {verbu}

puisìa:

• Ma ora ca si' mia, Fata Murgana,
  'ddi peni non li vogghiu jastimari:
  tantu chiù costa la priiza umana,
  tantu chiù fitta si voli sarvari.
  ("Vanna", Martoglio)

matri  {sust.}

puisìa:

• Mamma, mammuzza, si 'n avissi a tia,
  ju 'ntra 'stu munnu, mi sintissi persu;
  ti vogghiu beni chiù di l'Universu,
  chiù di la vista e chiù di l'arma mia.
  ("Nataliziu", Martoglio)

oduri  {sust.}

puisìa:

• pirchí dici ca ju, ccu 'sta parrata
  ci portu oduri di fastuca e 'ntrita,
  di ficudinnia di la sipalata,
  di nipitedda e zagara ciurita.
  ("Dialugu tra l'auturi e lu so' libru", Martoglio)

patiri  {verbu}

puisìa:

• Ju pattiría li guai di lu linu,
  tagghiatu tuttu, poi stisu a lu chianu,
  poi mazzïatu e fattu finu finu,
  senza ca nni ristassi un filu sanu;
  poi fattu matapolla e musulinu,
  poi fazzulettu, pri li vostri manu;
  d'accussí sulu vi staría vicinu
  e no ca v'è guardari di luntanu!...
  ("Tidda", Martoglio)

pèrdiri  {verbu}

puisìa:

• – Ahi! – dissi la picciotta – "Comu abbrama!
  Nun è lu dari ca struj e consuma,
  ma lu perdiri l'oggettu chi s'ama".
  ("Nun è lu dari ca struj e consuma", Martoglio)

pinna  {sust.}

puisìa:

• L'amuri certi vòti, è cungignatu,
  comu a du' aceddi di diversi nida:
  unu vola luntanu, ch'è 'mpinnatu,
  'n autru è senza pinni e non si fida!...
  Cci crisciunu li pinni 'ntra li cianchi,
  pensa a la cumpagnedda e l'assicuta;
  ma già la trova ccu l'aluzzi stanchi
  e senza pinni, pirchí fa la muta!
  ("Vanna", Martoglio)

pirciari  {verbu}

puisìa:

• Comu percia la petra la stizzana,
  'ccussí lu cori to' sappi pirciari;
  non fu 'ntra 'n'ura, o un jornu, o 'na simana,
  e mancu senza chianciri e pinari.
  ("Vanna", Martoglio)

scuru  {agg.}

puisìa:

• La luna nesci quann'è scuru fittu
  e ju sparagnu sopra l'ogghiu a gassi...
  lu suli nesci a jornu; chi nni fazzu?
  ("Lu suli e la luna", Martoglio)

vasata  {sust.}

puisìa:

• Tu dunami la solita vasata,
  e po' fammi durmiri ccu la testa
  supra lu pettu to' amurusu e santu!
  ("Nataliziu", Martoglio)

vastuneddu  {sust.}

puisìa:

• Vogghiu sanari tutti li to' chiaja,
  vogghiu fàriti ricca e vogghiu 'siri
  lu vastuneddu di la to' vicchiaja!
  ("Onomasticu", Martoglio)

vecchiu  {agg.}

puisìa:

• – Quannu saremu vecchi, amata Vanna,
  non mi nni darai chiù vasuni ardenti!...
  Non cantiremu chiù la Marianna,
  un avremu chiù capiddi e mancu denti!
  ("Vanna", Martoglio)

vita  {sust.}

puisìa:

• Juncíu la Vita 'ntra 'na gran citati
  e ddà 'ncuntrò l'Amuri, tuttu armatu,
  Iddu ci dissi: "bedda, a cu circati?"
  Idda rispusi: "A lu me' parintatu;
  cercu lu Preju e la Felicitati..."
  "Oh!" ci dissi l'Amuri, "stamu allatu."
  "Cercu lu Chiantu..." "E non v'alluntanati,
  ca stamu 'ntra lu stissu purticatu!"
  ("Amuri anticu e amuri prisenti", Martoglio)